Back to Top

Phone இல் முகத்தை ஸ்கேன் செய்வது கட்டாயம்

Phone இல் முகத்தை ஸ்கேன் செய்வது கட்டாயம்

December 2, 2019  10:53 am

Bookmark and Share
சீனாவில் புதிய செல்பேசி சேவைகளை பெறுவதற்கு பதிவு செய்கின்றவர்கள் தங்களின் முகத்தை ஸ்கேன் செய்ய வேண்டியது கட்டாயமாக்கப்படுகிறது.

நாட்டிலுள்ள மில்லியன் கணக்கான இணையதள பயனாளர்களின் அடையாளங்களை அதிகாரிகள் சரிபார்ப்பதற்கு இது அவசியமாகிறது என்று தெரிவிக்கப்பட்டுள்ளது.

கடந்த செப்டம்பர் மாதம் அறிவிக்கப்பட்ட இந்த புதிய விதிமுறை டிசம்பர் ஒன்றாம் தேதி தொடங்கி அமலாகும் என்று தெரிவிக்கப்பட்டிருந்தது.

இணையவெளியில் சஞ்சரிக்கும் குடிமக்களின் சட்டபூர்வ உரிமைகளையும், நலன்களையும் பாதுகாக்க விரும்புவதால் இந்த நடவடிக்கை மேற்கொள்ள படுவதாக சீன அரசு தெரிவித்திருக்கிறது.

சீனாவின் மக்களை கண்காணிக்க முகத்தை அடையாளங்காணும் தொழில்நுட்பத்தை அந்நாட்டு அரசு ஏற்கெனவே பயன்படுத்தி வருகிறது.

இத்தகைய தொழில்நுட்பங்களை உலக அளவில் அதிகம் பயன்படுத்தும் நாடாக சீனா உள்ளது. ஆனால், சமீபத்தில் நாடு முழுவதும் இதனை அதிகமாக பயன்படுத்த தொடங்கியிருப்பது அந்நாட்டில் விமர்சனங்களை உருவாக்கியுள்ளது.

புதிய செல்பேசி சேவை அல்லது புதிய தரவுகளை பதிவிறக்கும் வசதியை பெற மக்கள் முயலும்போது அவர்களின் தேசிய அடையாள அட்டையை வழங்க வேண்டும். அவர்கள் புகைப்படமும் எடுக்கப்படுகிறார்கள்.

ஆனால், மக்கள் வழங்குகின்ற அடையாள அட்டையோடு, அவர்களது அடையாளங்கள் ஒத்து போகின்றனவா என்பதை பார்க்க அவர்களின் முகம் இப்போது ஸ்கேன் செய்யப்படும்.

தங்களின் சொந்தப் பெயர்களில் மக்கள் இணைய வசதியை பயன்படுத்துகிறார்களா என்பதை அறிய சீனா இத்தகைய விதிமுறைகைள அமலாக்க பல ஆண்டுகளாக முயன்று வருகிறது.

இணையத்தில் மக்கள் ஏதாவது பதிவிட வேண்டுமானால் அர்களின் உண்மையான அடையாளத்தை சரிபார்க்கும் புதிய விதியை சீனா கடந்த 2017 ம் ஆண்டு அமலாக்கியது.

சீனாவின் தொழில்துறை மற்றும் தகவல் தொழில்நுட்ப துறை அமைச்சகம் உருவாக்கியுள்ள தொலைபேசி சேவை வழங்கும் நிறுவனங்கள் கடைபிடிக்க வேண்டிய புதிய விதிகள், செல்பேசி சேவையை பயன்படுத்துகிறவர்களை கண்டறிந்து கொள்ளும் வகையில் உருவாக்கப்பட்டுள்ளன.

சீன மக்களில் அதிகமானோர் தங்களின் செல்பேசி வழியாகதான் இணையத்தை பயன்படுத்தி வருகின்றனர்.

இந்த விதி அமலாக்கப்படும் என்று கடந்த செப்டம்பர் மாதம் அறிவிக்கப்பட்டபோது, சீன ஊடகங்கள் இதனை பெரிதாக கண்டுகொள்ளவில்லை. ஆனால், இத்தகைய நடவடிக்கை தீவிர கண்காணிப்பை வலுப்படுத்தும் என்று மக்கள் பலரும் சமூக ஊடகங்களில் கவலை தெரிவித்திருந்தனர்.

Most Viewed