Back to Top

அரச பஸ் சேவை 10 வருடங்களாக இடை நிறுத்தம் - மக்கள் பெரும் அவதி

அரச பஸ் சேவை 10 வருடங்களாக இடை நிறுத்தம் - மக்கள் பெரும் அவதி

July 16, 2017  06:35 pm

Bookmark and Share
நுவரெலியா மாவட்டம் கொத்மலை பிரதேச சபைக்கு உட்பட்ட கண்டி நுவரெலியா பிரதான பாதையில் இருந்து பெரட்டாசி தோட்டத்திற்கு செல்லும் பிரதான 15 கி.மீ பாதை சுமார் 15 வருடங்களுக்கு மேல் மிகவும் பாதிப்புக்கு உள்ளாகி போக்குவரத்திற்கு உகந்ததாக இல்லை.

இதனால் இந்த பிரதேசத்தில் வாழும் 10 ஆயிரத்திற்கு மேற்பட்ட பொது மக்கள் பாதிப்புக்கு உள்ளாகி உள்ளனர்.

இப்பிரதேசத்தில் பெரட்டாசி, கரகஸ்தலாவ, எல்பொட போன்ற கிராம சேவகர் பிரிவுகளை சேர்ந்த ரஸ்புருக் தோட்டம்¸ பெரட்டாசி தோட்டம்¸ பூச்சிகொட தோட்டம்¸ பெரட்டாசி தொழிற்சலை பிரிவு தோட்டம்¸ மேரியல் தோட்டம்¸ அயரி தோட்டம்¸ எல்பொட வடக்கு தோட்டம்¸ மேமொழி தோட்டம்¸ காச்சாமலை தோட்டம்¸ கட்டகித்துல தோட்டம்இ வெதமுள்ள கெமினிதன் தோட்டம்¸ கந்தலா தோட்டம் உள்ளடங்குகின்றன.

சுமார் 10 வருடங்களுக்கு முன்னர் இந்த பாதையில் அரச போக்குவரத்து சேவை இருந்தது அதுவும் பாதை அவலம் காரணமாக இடை நிறுத்தபட்டுள்ளது.

இப்பிரதேசத்தில் காணப்படும் 8 பாடசாலைகளுக்கு செல்லும் ஆசிரியர்கள் பஸ் உரிய நேரத்திற்கு செல்லாததினால் காலை 9.00 மணிக்கே பாடசாலை செல்கின்றனர்.

இதனால் மாணவர்களின் கல்வி நிலையும் பாதித்து வருகின்றது.

தற்​ேபாது சுமார் 9 தோட்டங்களுக்கும் பொதுவாக ஒரு வைத்தியசாலையே செயற்பட்டு வருகின்றது.

இங்கும் ஒரு வைத்தியரே பணியில் உள்ளார்.

இந்த வைத்தியசாலையில் இருந்து அவசர தேவை ஏற்படும் போது நோயாளர்களை தோட்ட லொறிகள் மூலமாகவே புஸ்ஸலாவ பிரதேசத்தில் உள்ள வைத்திசாலைக்கு அனுப்பபடுகின்றனர்.

நோயாளர் காவு வாகன வசதியும் இல்லை. சிலர் முச்சக்கர வண்டிகளில் செல்கின்றனர்.

பாதையோ குன்றும் குழியுமாக உள்ளது. லொறியிலும் முச்சக்கர வண்டியிலும் செல்லும் போது வழியிலேயே மகப்பேறு ஏற்படுகின்றது.

சிலர் தகுந்த நேரத்தில் வைத்தியசாலையில் அனுமதிக்கப்படாமையால் வழியிலேயே இறந்து விடுகின்றனர்.

இந்த பாதையின் ஒரு பகுதி முன்னைய அரசாங்க காலத்தில் 3.கி.மீ திருத்தப்பட்டது.

அரசாங்க மாற்றத்தின் பின்னர் இந்த வேலைதிட்டம் தொடர்ந்து முன்னெடுக்கபடவில்லை. முற்றாக இடை நிறுத்தபட்டுள்ளதாக அத தெரண செய்தியாளர் தெரிவிக்கிறார்.

தற்போது இந்த பாதையின் இரு மருங்கிலும் தோட்ட நிர்வாகங்களால் கல், மண் உட்பட புற்களை இட்டு செப்பனிட்டு வருகின்றனர்.

இதனால் மழைக் காலங்களில் பாதை மிகவும் பாதிக்கபட்டு சேறாக உள்ளது.

பாதை அவலம் காரணமாக பல முறை பல விபத்துகளும் இடம்பெற்று பலர் இறந்து போயுள்ளனர்.

எனவே இந்த பாதையை உடனடியாக திருத்தி தறுமாறு மக்கள் கோரிக்கை விடுக்கின்றனர்.

இந்த பாதையை செய்து தருவதாக மலையகத்தின் அரசியல் தலைமைகள் காலத்திற்கு காலம் தேர்தல் நேரங்களில் வாக்குறுதி அளித்தாலும் அவை நடைமுறைபடுத்துவதாக தெரியவில்லை என பிரதேச மக்கள் குற்றம்சுமத்துகின்றனர்.

தேர்தல் காலங்களில் சென்றவர்களில் ஒரு சிலரை தவிர பெரும்பாலான அரசியல் தலைவர்கள் அந்த பக்கம் வந்ததாக தெரியவில்லை என மக்கள் தெரிவிக்கின்றனர்.

(அத தெரண நிருபர்)