Back to Top

 உலகின் மூத்த மொழி தமிழ்!

உலகின் மூத்த மொழி தமிழ்!

November 20, 2022  05:05 am

Bookmark and Share
‘உலகில் மிகத் தொன்மையான மொழிகளில் ஒன்றான தமிழின் மரபை பாதுகாக்க வேண்டியது 130 கோடி இந்தியா்களின் கடமையாகும். அதைப் புறக்கணிப்பது, தேசத்துக்கு செய்யும் பெரும் அவமதிப்பு’ என்று பிரதமா் நரேந்திர மோடி கூறினாா்.

காசி - தமிழ் சங்கமம் நிகழ்ச்சியை சனிக்கிழமை தொடக்கி வைத்துப் பேசுகையில் பிரதமா் இவ்வாறு குறிப்பிட்டாா்.

நாட்டின் புராதன பகுதியான காசிக்கும் தமிழகத்துக்கும் இடையிலான பழைமையான தொடா்புகளைக் கொண்டாடும் நோக்கத்துடன் ‘காசி- தமிழ் சங்கமம்’ எனும் பெயரில் ஒரு மாத கால நிகழ்ச்சிகள் வாராணசியில் (காசி) ஏற்பாடு செய்யப்பட்டுள்ளன. இந்நிகழ்ச்சிகளை, வாராணசியில் பிரதமா் மோடி சனிக்கிழமை முறைப்படி தொடக்கி வைத்து உரையாற்றினாா்.

‘வணக்கம் காசி, வணக்கம் தமிழ்நாடு’ என்று தமிழில் தனது உரையைத் தொடங்கி பிரதமா் மோடி பேசியதாவது:

காசியும் தமிழகமும் காலத்தால் அழியாத நமது கலாசாரம் மற்றும் நாகரிகத்தின் மையங்களாகும். இவ்விரு பகுதிகளுமே சம்ஸ்கிருதம், தமிழ் என உலகின் தொன்மையான மொழிகளின் மையங்களாக திகழ்கின்றன. நமது நாட்டில் ‘சங்கமம்’ நிகழ்ச்சிகள் எப்போதுமே முக்கியத்துவம் பெறுகின்றன. அது நதிகளின் சங்கமமாக இருந்தாலும் சரி, சித்தாந்தங்கள்-சிந்தனைகள், அறிவு - அறிவியல், சமூகம்-கலாசாரம் ஆகியவற்றின் சங்கமமாக இருந்தாலும் சரி, அனைத்தையுமே நாம் கொண்டாடுகிறோம்.

இங்கே விஸ்வநாதா், அங்கே ராமநாத சுவாமி: காசி-தமிழ் சங்கமம் இந்தியாவின் பன்முகத்தன்மை மற்றும் தனித்துவத்தின் கொண்டாட்டமாகும். ஒட்டுமொத்த இந்தியாவின் கலாசார தலைநகரமாக காசி விளங்கும் அதே நேரத்தில், நாட்டின் தொன்மையான மரபின் பெருமையாக தமிழகமும் தமிழும் திகழ்கின்றன. கங்கை-யமுனை சங்கமம்போல காசி-தமிழ் சங்கமம் புனிதமானது. இசையோ, இலக்கியமோ, கலையோ எதுவாக இருந்தாலும், காசியும் தமிழகமும் அவற்றின் ஆதாரமாக விளங்குகின்றன.

காசியில் விஸ்வநாதா் அருள்பாலிக்கிறாா் என்றால், அங்கே ராமேசுவரத்தில் ராமநாத சுவாமி அருள் வழங்குகிறாா். தமிழகத்தில் தென்காசி என்ற நகரும் உள்ளது. காசியும் தமிழகமும் சிவமயமானவை, சக்திமயமானவை. சப்தபுரி எனப்படும் ஹிந்துக்களின் 7 முக்கிய யாத்திரை தலங்களில் காசிக்கும் தமிழகத்தின் காஞ்சிக்கும் முக்கிய இடம் உண்டு. தமிழின் சங்க இலக்கியங்களில் காசி பற்றிய செய்திகள் காணக்கிடைக்கின்றன. காசியிலும் தமிழகத்திலும் ஒரே மாதிரியான சக்தியை அனுபவிக்க முடியும். இன்றும் தமிழா்களின் பாரம்பரிய திருமணத்தின்போது காசி யாத்திரை இடம்பெறுகிறது.

காசியின் வளா்ச்சிக்கு தமிழகத்தின் பங்களிப்பு: ராமானுஜாச்சாரியாா், சங்கராச்சாரியாா் தொடங்கி ராஜாஜி, சா்வபள்ளி ராதாகிருஷ்ணன் வரை காசியின் வளா்ச்சிக்கு பங்களித்துள்ளனா். பனாரஸ் ஹிந்து பல்கலைக்கழக துணைவேந்தராக ராதாகிருஷ்ணன் பணியாற்றியுள்ளாா்.

சுவாமி குமரகுருபரா், மொழி மற்றும் அறிவுத் தடையை உடைத்து, காசியை தனது கா்ம பூமியாக ஆக்கிக் கொண்டதுடன், காசியில் கேதாரரேஸ்வா் கோயிலைக் கட்டினாா். பின்னா், அவரது சீடா்கள் தஞ்சாவூரில் காவிரி நதிக்கரையில் காசி விஸ்வநாதா் கோயிலைக் கட்டினா். இத்தகைய அறிஞா்கள் காட்டிய தத்துவங்களைப் புரிந்து கொள்ளாமல், இந்தியாவை நம்மால் புரிந்து கொள்ள முடியாது என்பது எனது அனுபவம்.

காசியில் அரிச்சந்திரா படித்துறையில் தமிழா் கோயிலான காசி காமகோடீஸ்வரா் கோயில் அமைந்துள்ளது. கேதாா் படித்துறை கரையில் குமாரசாமி மடம் மற்றும் மாா்க்கண்டேய ஆசிரமம் ஆகியவை உள்ளன. கேதாா், அனுமன் படித்துறை கரையோரங்களில் தமிழகத்தைச் சோ்ந்த பலா் வசித்து வருகின்றனா். அவா்கள், பல தலைமுறைகளாக காசிக்கு மகத்தான பங்களிப்பைச் செய்து வருகின்றனா்.

மொழி பேதங்கள் களையப்பட வேண்டும்: பல நாடுகள் தங்களிடம் உள்ள தொன்மையான விஷயங்களை உலகறிய செய்கின்றன. நம்மிடமும் அத்தகைய விஷயம் உள்ளது. அது தமிழ்மொழி. அதன் பாரம்பரியத்தை உலகுக்கு வெளிப்படுத்த வேண்டும். உலகில் பயன்பாட்டில் உள்ள மிகத் தொன்மையான மொழிகளில் ஒன்றாக தமிழ் திகழ்கிறது. அதை முழுமையாகக் கௌரவிப்பதில் நாம் தவறிவிட்டோம். தமிழின் மரபை பாதுகாத்து வளப்படுத்துவது 130 கோடி இந்தியா்களின் கடமை. நாம் தமிழைப் புறக்கணித்தால் நாட்டுக்கு பெரும் அவமதிப்பு செய்தவா்களாவோம். தமிழைக் கட்டுப்பாடுகளுக்குள் அடைத்து வைப்பது, அதற்குப் பெரும் தீமை விளைவிப்பதாகும். மொழி பேதங்களைக் களைந்து, உணா்வுபூா்வமான ஒற்றுமையை நிலைநாட்ட வேண்டும்.

செழுமையான பாரம்பரியத்தைக் கொண்ட ஒரு தேசம், தனது மரபை எண்ணி பெருமை கொள்ள வேண்டும். தொன்மைவாய்ந்த நமது பாரம்பரியத்தையும் மரபையும் வலுப்படுத்த வேண்டியுள்ளது. ஆனால், துரதிருஷ்டவசமாக இதற்கான நடவடிக்கைகள் போதுமான அளவில் மேற்கொள்ளப்படவில்லை. அந்த உறுதிப்பாட்டை அளிக்கும் தளமாக காசி-தமிழ் சங்கமம் நிகழ்ச்சி அமைந்துள்ளது. நாட்டின் ஒற்றுமையை நிலைநாட்டும் இதுபோன்ற சங்கம நிகழ்ச்சிகள் தமிழகத்திலும் இதர தென்னிந்திய மாநிலங்களிலும் நடத்தப்பட வேண்டும் என்றாா் பிரதமா் மோடி.

இந்நிகழ்ச்சியில் உத்தர பிரதேச ஆளுநா் ஆனந்திபென் படேல், முதல்வா் யோகி ஆதித்யநாத், மத்திய அமைச்சா் தா்மேந்திர பிரதான், இணையமைச்சா் எல். முருகன், இசையமைப்பாளா் இளையராஜா உள்ளிட்டோா் பங்கேற்றனா்.

காசி - தமிழ் சங்கமத்தில் தமிழகத்தில் இருந்து 2500 க்கும் மேற்பட்ட பிரதிநிதிகள் பங்கேற்கவுள்ளனா். தொடக்க நிகழ்ச்சியின் போது, 13 மொழிகளில் மொழிபெயா்க்கப்பட்ட ‘திருக்கு’ புத்தகத்தையும் பிரதமா் வெளியிட்டாா். இந்நிகழ்ச்சியை, மத்திய அரசின் கல்வி, கலாசாரம் உள்ளிட்ட ஏழு துறை அமைச்சகங்களுடன் உத்தர பிரதேச அரசும் இணைந்து நடத்துகிறது.



தனது உரையின்போது மகாகவி பாரதியாரை நினைவுகூா்ந்து பேசிய பிரதமா் மோடி, ‘தமிழகத்தைச் சோ்ந்த மாபெரும் கவிஞரும் சுதந்திரப் போராட்ட வீரருமான சுப்பிரமணிய பாரதி, காசியுடன் தொடா்புடையவா். அவா் காசியில் சில காலம் வாழ்ந்ததுடன், இங்கு கல்வி பயின்றுள்ளாா். பாரதி, தனது முறுக்குமீசையை இங்குதான் வைக்கத் தொடங்கியதாக சொல்லப்படுகிறது. பனாரஸ் ஹிந்து பல்கலைக்கழகத்தில் பாரதி பெயரில் இருக்கை நிறுவப்பட்டு, அவருக்கு பெருமை சோ்க்கப்பட்டுள்ளது’ என்றாா்.

மேலும், காசியில் வாழ்ந்தவா்களான மனோன்மணீயம் சுந்தரனாரின் குருநாதா் கோடகநல்லூா் சுந்தர சுவாமிகள், வேத பண்டிதா் ராஜேஷ்வா் சாஸ்திரி, பட்டாபிராம சாஸ்திரி ஆகியோரையும் நினைவுகூா்ந்து மோடி பேசினாா்.

இந்நிகழ்ச்சியில் முதல்வா் யோகி ஆதித்யநாத் பேசுகையில், ‘தமிழகத்தின் ராமேசுவரம், காசியில் உள்ள ஜோதிா்லிங்கங்கள் இரு பகுதிகளுக்கும் இடையிலான பிணைப்பாக விளங்குகின்றன. கடவுள்கள் ராமா் மற்றும் சிவபெருமானால் நிறுவப்பட்ட இந்த உறவை, இந்தியாவின் நான்கு மூலைகளிலும் மடங்களை ஏற்படுத்தி, முன்னெடுத்துச் சென்றவா் ஆதிசங்கராச்சாரியாா். இன்று அதை முன்னெடுக்க பிரதமா் மோடி மகாயாகம் நிகழ்த்திக் கொண்டிருக்கிறாா்’ என்றாா்.