நியுஸிலாந்தில் தற்போது நடைபெற்று வரும் இலங்கை அணி பங்கேற்கும் ஒருநாள் மற்றும் T20 கிரிக்கெட் போட்டிகளின் உத்தியோகப்பூர்வ அனுசரணையாளர்களில் ஒருவராக கொமர்ஷல் வங்கி இடம் பிடித்துள்ளது.

´இலங்கையில் மிகவும் பின்பற்றப்படும் ஒரு விளையாட்டாக கிரிக்கெட் திகழ்கின்றது. இலங்கை தேசிய கிரிக்கெட் அணி மீது பற்று கொண்டவர்களாகவே பெரும்பாலும் ஒவ்வொரு இலங்கையரும் உள்ளனர்´ என்று வங்கியின் வாடிக்கையாளர் சேவைப்பிரிவு மற்றும் சந்தைப்படுத்தல் பிரதிப் பொது முகாமையாளர் திரு. ஹஸ்ரத் முனசிங்க கூறினார். ´இலங்கை தேசிய கிரிக்கெட் அணியுடன் நேரடியாக இணைந்து கொள்வது ஒரு முக்கியமான சந்தர்ப்பமாகக் கருதப்படுகின்றது. இதுவரை முக்கியமான முன்னணி வர்த்தக முத்திரைகளால் மட்டுமே இது சாத்தியமாகி உள்ளது. அந்த வகையில் நாட்டின் முன்னணி வர்த்தக முத்திரை என்ற வகையில் கொமர்ஷல் வங்கி நியுலாந்தில் இலங்கை அணி விளையாடும் ஒரு நாள் மற்றும் T20 போட்டிகளின் போது இந்த பொறுப்பை ஏற்றுள்ளது´ என்று அவர் மேலும் கூறினார்.

நியுஸிலாந்துக்கு இலங்கை அணி மேற்கொண்டுள்ள சுற்றுலா இரண்டு டெஸ்ட் போட்டிகள் மூன்று ஒருநாள் போட்டிகள் மூன்று T20 போட்டிகள் என்பனவற்றை உள்ளடக்கியதாகும். மார்ச் மாதம் ஒன்பதாம் திகதி கிறைஸ் சேர்ச்சில் முதலாவது டெஸ்ட் போட்டியுடன் சுற்றுலா ஆரம்பமானது. இந்த டெஸ்ட் போட்டிகள் சர்வதேச கிரிக்கெட் கழகத்தின் (ICC) 2021-23 காலப்பகுதிக்கான உலக டெஸ்ட் சாம்பியன்ஷிப்பின் ஒரு அங்கமாகும். மூன்று 50 ஓவர் ஒருநாள் போட்டிகள் 2023 ICC ஆண்கள் ஒரு நாள் உலகக் கிண்ண சுபர் லீக் போட்டிகளோடு தொடர்படையது.